上山下海扮靚義工犬

Momo今年九月就15歲啦，佢由細到大都係同媽媽一齊住，佢第一任爸爸移民咗澳洲之後就拋棄咗佢哋，所以Momo同媽媽就相依為命。

Momo媽媽當Momo係自己仔仔一樣，經常帶Momo四處去玩，四處去認識新朋友，上山下海，四圍去玩；因為Momo媽媽鍾意扮靚同埋對設計方面有興趣。 所以經常同Momo去參加一啲Model比賽，服裝比賽，造型比賽等等。

Momo亦都好叻仔多次比賽都有好好嘅成績，近呢兩年Momo媽媽同Momo開始參與唔同嘅義工活動亦都加入咗唔同嘅義工組織。Momo而家已經係寵物救護大使，愛護動物協會義工，水警警區義工犬。

佢哋已經去過唔同嘅學校，老人院，宣揚愛護動物活動，主要宣傳愛護動物嘅訊息，等多啲人接受，動物認識動物。Momo媽媽仲話而家多咗好多人養動物，想感染多啲人做個高質嘅主人，例如去街要着尿片，去街街要帶拖繩等等。

佢哋想以生命影響生命，證明年紀大咗嘅老狗，只要身體健健康康，仲可以四圍去玩，對社會仲可以有好大嘅貢獻㗎。

唔係老咗就要掉出街或者匿喺屋企，未來嘅日子只要Momo媽媽同Momo都健健康康，佢哋話橫掂都去街，不如去做義工啦，更有意義喎！

拉票宣言

希望大家支持Momo，支持佢繼續15歲之後健健康康，以生命影響生命。

繼續做小義工推廣愛護動物嘅訊息，同埋Momo同Momo媽媽感染身邊嘅家長們做個高質素嘅家長，咁呢個社會就會更加接納小動物。